उद्घाटित भेल तिरहुत राइस मिल

सीतामढ़ी : जिलाक औद्योगिक क्षेत्रमे बीतल शुक्र केँ ग्रीन अर्थ फर्टिलाइजर प्राइवेट लिमिटेड द्वारा तिरहुत राइस मिल उद्घाटित भेल। एहि राइस मिल क खुजलाक बाद कृषि आधारित जिलाक मध्यम आ उच्चत्तर किसान केँ सही समय पर धानक नगद बिक्री कऽ आर्थिक लाभ भेटत। पिछड़ल क्षेत्र मे प्रतिदिन सौ टन चावल उत्पादन क्षमता वला उद्योगक स्थापना मिथिला मे उद्योगक संभावना केँ जिऔने अछि। मिथिला मे बहुतो राइस मिल अछि मुदा तिरहुत राइस मिल अत्याधुनिक उपकरण सं सुसज्जित अछि। मिलक प्रबंध निदेशक सुबोध कुमारक कहब अछि जे जिला मे नगदी फसलक रूपे कुशियारक खेती केँ मानल जाइत छल। आब एतुक्का किसान नगदी फसलक रूपे धान केँ खेतीक विकल्प बना सकैत छथि। ओ जिलाक किसान सं धानक उत्तम किस्मक उत्पादन कऽ सीधे आर्थिक लाभ उपार्जन करबाक अपील केलन्हि।