तीन दिनी उग्रतारा महोत्सव आइ सं

सहरसा : तीन दिनी उग्रतारा महोत्सवक उदघाटन बिहार सरकारक वित्त मंत्री बिजेंद्र प्रसाद यादव करता। भूमि सुधार आ राजस्व मंत्री समारोहक मुख्य अतिथि आ पर्यटन मंत्री डॉ इकबाल अंसारी विशिष्ट अतिथि रहता। महोत्सवक तीनू दिन स्थानीय कलाकारक प्रस्तुति रहत आ राति मे आमंत्रित कलाकार अप्पन प्रदर्शन करत। शुक्र केँ प्रसिद्ध गायिका शारदा सिन्हा, शनि केँ भोजपुरी गायिका देवी अ अंतिम माने रवि क राइत गजल सम्राट चंदन दास जीक प्रस्तुति रहत।

ओना भगवती उग्रतारा आ महामीमांसक मंडन मिश्रक महिमा केँ विश्वस्तर धरि पहुंचेबाक लेल शुरू कएल गेल महोत्सवक स्थिति तेसर बरख नीक नहि कहल जा सकैछ। सरकारी उपेक्षाक कारणे एहि तीन दिनी राजकीय महोत्सव लेल प्रचार-प्रसारक कोनो टा व्यवस्था नहि कएल गेल। जिला भरि मे कतुहो कोनो पोस्टर तक नहि टांगल गेल, एहि बेरक महोत्सवक खानापूर्ति सन बुझा रहल अछि। इ गप्प आम लोकक बुझबा सं उप्पर अछि जे राजकीय महोत्सवक दर्जा प्राप्त कऽ चुकल एहि महत्वपूर्ण कार्यक्रमक प्रति शुरु सं राज्य सरकार आ जिला प्रशासन एतेक सुस्त कियैक बनल रहल ?