महिषीक उग्रतारा परिसर होएत विकसित : लालू

सहरसा : परिवर्तन यात्राक बीच रवि दिन सहरसा पहुंचल राजद सुप्रीमो लालू प्रसाद कार्यक्रमक उपरांत सीधे महिषी मां उग्रताराक दरबार मेँ पहुंचला आ मैयाक पूजा अर्चना केलैथ।
पुजा अर्चनाक उपरांत राजद सुप्रीमो कहलैथ जे पहिले हमरा एहि स्थानक संबंध में पता नहिँ छल। पर्यटन विभागक पोथी में पढ़लाक बाद पता चलल जे इहो प्रसिद्ध शक्ति पीठ अछि। एतय मैयाक पूजा कऽ बहुत खुशी भेटल। एहि स्थलक पर्यटन क्षेत्र पूर्ण विकसित कैल जाओत। एकरा लेल ओ केन्द्र में आवाज उठौता। लोक सभ केँ कहला पर राजद सुप्रीमो कोसीक महत्वपूर्ण पुरातात्विक क्षेत्रक उत्खनन लेल केन्द्र में आवाज उठाबय केर बात कहलैथ। राजद सुप्रीमोक महिषी आगमन पर राजद कार्यकर्ता द्वारा ढ़ोल नगाड़ाक संग स्वागत कैल गेल। मंदिर परिसर में वेद विद्या केन्द्रक बच्चा द्वारा वेदध्वनीक संग नेताक लोकनिँक स्वागत कैल गेलन। राजदक नितिन ठाकुर केँ मिथिलाक रीति रिवाजाक अनुसार पाग आ चादर पहिरा कऽ लालू यादव संगे सभ नेताक स्वागत कैल गेल।एहि मौका पर बहुतो राजद नेता संगे कार्यकर्ता आ लोक सभ उपस्थित छलैथ।