बाढ़िक चपेटमे फेर आएल जोगबनी

अररिया : भारी बरखासं नदीमे पानि बढ़लासं जोगबनी केर कतेको वार्डमे बाढ़िक पानि फेर घुसि गेल अछि। जोगबनी थाना टापूमे तब्दील भऽ गेल अछि। जाहिसं सुरक्षा केर समस्या ठाढ़ भऽ गेल अछि।
प्राप्त जानकारी केर अनुसार भारी बरखासं नदीमे आएल उफानसं नगर पंचायत जोगबनी केर इन्द्रानगर, खजुरबाड़ी, पुराना जोगबनी, घुसकीपट्टी केर दर्जनों घरमे बाढ़िक पानि फेर घुसि आएल। जाहिसं लोक सभ घर छोड़ि सुरक्षित ठाम पर जा रहल छथि। संगहि भारी बरखाकेँ कारणे जोगबनी थाना परिसरमे ठेहुन भरि पानिक भरि जेबासं थाना टापूमे बदलि गेल अछि जाहिसं हथियारक संग-संग सुरक्षा व्यवस्था सेहो चरमरा गेल अछि।
एम्हर बाढ़ि पीड़ितक कहब अछि जे पिछला बेर हमर सभक घरमे बाढ़िक पानी ऐबाक बाद प्रशासन द्वारा अखन धरि राहतक कोनो काज नहि कएल गेल अछि। एतबा नहि एतुक्का जनप्रतिनिधी सेहो बजबा केँ अलावा एहि दिशामे कोनो कदम नहि उठौलनि।