हुकुमदेवक बयान पर मचल घमासान

दरभंगा/मधुबनी : हुकुमदेवक मिथिला राज्यक विरोधी बयान पर घमासल मचल अछि।श्री यादवक मिथिला राज्य विरोधी बयान केँ घोर निँदा करैत संगे बयान आपिस लेबाक मांग मिथिला राज्य निर्माण सेना हुकुमदेवक पुतला दहन कऽ कएने छल।मुदा आब स्थानीय जनाधिकार मंच, बेनीपुर केँ कार्यकर्ता मिथिला राज्यक विरोध करनिहार मधुबनीक सांसद हुकुमदेव नारायण यादवक सम्मान करत। मंचक संयोजक डॉ.रमण कुमार झा आ अध्यक्ष अवधेश कुमार झा कहलनि जे श्रीयादव क्षेत्रीयता केर प्रवृत्ति पर चोट कऽ राष्ट्रवादी काज केलनि। एहि साहसिक आ दूरदर्शी बयान केँ देखैत मंचहुनका जल्दिये बेनीपुरमे सम्मानित करत। दूनु गोटेँ कहलनि जे अखन धरि आधादर्जनसं बेसी मैथिल नेता बिहारक मुख्यमंत्री आ सैकड़ों मंत्री रहल छथि तखन फेर मिथिलाक विकास कियैक नहि भेल।हिनक कहब छल जे छोट राज्य विकासक मापदंड होइत तऽ पूर्वोत्तर राज्य आइ विकसित राज्यक श्रेणीमे होइतै जखनकि ओ सबसं पिछड़ल अछि। इ संस्था हुकुमदेव नारायण यादवक पुतला दहन केनिहारक आलोचना केलक अछि।

बताबी जे मिथिला राज्य निर्माण सेना कतेको ठाम श्री यादवक बयानक निँदा करैत पुतला दहन केलक अछि। गौर करबाक बात इ अछि जे मिथिलाक दू प्रमुख शहर दरभंगा केँ सांसद मिथिला राज्यक समर्थक छथि ओतय मधुबनी केँ सांसद मिथिला राज्य विरोधी। अखिल भारतीय मिथिला पार्टीक राजीव झा उर्फ कवि एकांत दरभंगाक सांसद केँ मिथिला राज्यक समर्थन करैत आ मधुबनीक सांसद केँ राज्य विरोध करबा केँ भाजपाक सुच्चा राजनीति कहि रहल छथि।