IM सरगना यासीन भटकल धराएल

दरभंगा : भारतीय पुलिसक नीन उड़ौनिहार इंडियन मुजाहिदीनक संस्थापक सदस्य यासिन भटकल भारत-नेपाल बार्डरक रक्सौल क्षेत्रसं धराएल। मिथिलाकेँ आतंकक गढ़ बनौनिहार यासीन भटकल केर गिरफ्तारीसं बिहार पुलिस राहत केर सांस लेलक अछि। भटकल केँ भारतक 12 राज्यक पुलिस ताकि रहल अछि। दरभंगामे पैघ समय धरि गुमनाम रहि भटकल कतेको युवाकेँ इंडियन मुजाहिदीनसं जोड़लक। पछिला किछु समयमे इंडियन मुजाहिदीनसं ताल्लुक रखबाक आरोपमे गिरफ्तार 13 लोकमे दरभंगा आ लगक होएबासं मिथिला केँ एहि आतंकी संगठनक गढ़क रूपमे देखल जा रहल छल। मिथिला सन शांति प्रदेशसं IM आतंकी केर गिरफ्तारीक कारण दरभंगा मॉड्यूल शब्द चलनमे आएल मुदा राष्ट्रीय जांच एजेंसी (NIA) दिससं केल गेल एहि शब्द पर बिहार सरकार आपत्ति जतौने छल। भटकल केर संग ओकर दाहिना हाथ मानल जाइ वला असदुल्लाह अख्तर केर गिरफ्तारीसं मैथिलकेँ आब उमीद अछि जे आब मिथिलाकेँ आतंकवादी सभसं मुक्ति भेटत।
भटकल दिल्लीक बटला हाउस कांडसं जुड़ल आजमगढ़ मॉड्यूल केर खुलासाक बाद मुस्लिम बहुल क्षेत्रक संग-संग भौगोलिक स्थितिकेँ देखैत दरभंगा केँ अप्पन ठिकानाक रुपे चुनने छल। तेज तर्रार मैथिल युवाकेँ गुमराह कऽ ओकरा आतंक केर बाट पर आनय वला भटकल अप्पन योजना केँ सफल बनेबामे एतेक शातिर अछि जे जाहि शख्स केर गिरफ्तारी भेल, पहिल नजरमे ओकरा आतंकसं जुड़ल हेबाक संदेह धरि नहि भेल।
देशमे कतेको ठाम पर भेल बम विस्फोटमे लिप्तता केर आरोपमे पछिला किछु समयमे गिरफ्तार भेल लोकमे असादुल्लाह रहमान उर्फ दिलकश, कफील अहमद, तलहा अब्दाली उर्फ इसरार, मुहम्मद तारिक अंजुमन, हारून राशिद नाइक, नकी अहमद, वसी अहमद शेख, नदीम अख्तर, अशफाक शेख, मुहम्मद आदिल, मुहम्मद इरशाद, गयूर अहमद जमाली आ आफताब आलम उर्फ फारूक शामिल हैं। एहिसं एकटा मुहम्मद आदिल पाकिस्तान अछि, बाकी 12 दरभंगा जिलाक रहनिहार अछि। एहि 13 संदिग्ध आतंकीमे सं 6 दिल्लीक तिहाड़ जेलमे, 4 बेंगलूरू आ 3 मुंबई केर जेलमे बंद अछि। एहि संदिग्ध आतंकी केर गिरफ्तारी लेल दरभंगा आ मधुबनीमे दिल्ली आ मुंबई पुलिसक संग-संग NIA लगातार छापा मारैत रहल। हरेक बेर एकटा न एकटा कोनो संदिग्ध आतंकी एहि टीमक हाथ आएल।