आतंकक नव राजधानी बनैत मिथिला

रक्सौल/मधुबनी/­दरभंगा पूर्णिया : आतंकवदी संगठन इंडियन मुजाहिदीनक सह-संस्थापक आ भारतक संग कतेको देशक एजेंसीक वांछित यासीन भटकल आ असादुल्लाह अख्तर उर्फ हड्डी केर गिरफ्तारीसं मिथिलामे आतंकवादी गतिविधिक एकटा आओर पुख्ता सबूत भेटल। ओना मिथिला क्षेत्रसं आतंकवादी केर गिरफ्तारीक इ कोनो पहिल मामला नहि अछि। एहिसं पहिलहु कतेको आतंकवादीक गिरफ्तारी भऽ चुकल अछि मुदा भटकल सन शीर्ष आतंकवादीक गिरफ्तारी मिथिलामे आतंकवादीक जड़ि मजबूत हेबाक आशंका आओर बढ़ा देलक अछि।
आतंकवादीक गिरफ्तारीक बाद पूछताछक बीच सुरक्षा एजेंसी केँ ऐहन सबूत भेटल अछि जाहिसं एहि गप्पक पुष्टि होइत अछिजे नेपालक रास्तासं आतंकवादी बिहारक सीमामे घुसैत अछि। सुरक्षा अधिकारीक मानी तऽ, देशक विभिन्न क्षेत्रमे भेल आतंकवादी घटनाक बाद संदिग्ध केर तकबामे एजेंसी आन राज्यक संग-संग मिथिला सेहो अबैत रहैत अछि। बिहार आ नेपालक सीमा खुलज रहबाके कारणे आतंकवादी एकर उपयोग देशमे जेबा-ऐबा लेल करैत अछि। बरख 2010मे बांग्लादेश भगबाक फिराकमे एकटा संदिग्ध तालिबानी आतंकी गुलाम रसूल उर्फ मिर्जा खान केँ पूर्णिया पुलिस गिरफ्तार केने छल। ओना एजेंसी एहि बातक लऽ आश्वस्त छल जे बिहारमे आतंकवादी घटना नहि होएत मुदा बोधगयामे विस्फोटक बाद एजेंसीक इ धारणा बदलि गेल।
एजेंसीक सूत्रक कहब अछि जे यासीन भटकलदेशमे आतंकवादी घटना केलाक बाद दरभंगा आ मधुबनीमे नुकाइत छल। किछु दिन पहिले एहने नुकाएल ठाम पर छापा मारि सुरक्षा एजेंसी केँ संदिग्ध वस्तु भेटल अछि। पछिला 10 बरखमे आतंकी गतिविधिमे रहबाक आरोपमे मिथिलाक्षेत्रसं दर्जन भरिसं बेसी संदिग्धक गिरफ्तारी भऽ गेल अछि।
दरभंगा जिलाक लहेरियासराय थाना क्षेत्रसं भटकलक सहयोगी मानल जाय वला मोहम्मद दानिश अंसारी केँ एहि बरख जनवरीमे गिरफ्तार कएल गेल छल। पुलिस आंकड़ाक मुताबिक बरख 2000मे सीतामढ़ी जिलासं आतंकवादी संगठन हिजबुल मुजाहिदीनक सदस्य मकबूल आ जहीर केँ गिरफ्तार करबामे पुलिस केँ सफलता भेटल छल जखन की 20 जुलाई, 2006 केँ मुंबई ATS टीम मधुबनी जिलाक बासोपटी गामसं मोहम्मद कमाल अंसारी केँ मुंबईमे भेल श्रृंखलाबद्ध विस्फोटक आरोपमे गिरफ्तार केने छल।
एकरा बाद 12 नवंबर, 2007 केँ मधुबनीक रहनिहार मोहम्मद सबाउद्दीन उर्फ फरहान केँ जयपुर केर रामपुर स्थित केन्द्रीय रिजर्व पुलिस बल (CRPF) शिविर पर गोलीबारी करबाक आरोपमे गिरफ्तार कऽ लेल गेल। एकरा बाद दिल्लीमे सरोजनी नगरमे भेल विस्फोटक मामिलामे नौ जुलाई, 2008 केँ उत्तर प्रदेश आतंकवाद निरोधी दस्ते (ATS) लखनऊसं मधुबनीक रहनिहार पप्पू खान केँ गिरफ्तार केने छल।
कनिके दिन बाद 14 अक्टूबर, 2008 केँ उत्तर प्रदेश (ATS) मधुबनीक रहनिहार मोहम्मद खलील केँ पकड़ने छल आ 17 अगस्त, 2009 केँ आतंकवादी संगठन एलईटी केर आतंकवादी उमर मदानी (मधुबनीक बासोपटी निवासी) केँ दिल्लीसं गिरफ्तार कएल गेल छल। पुलिस आंकड़ाकेँ मानी तऽ, रामपुरमे CRPF केँ शिविर पर हमला करबाक आरोपमे 2010 मे मधुबनीक गंधवारीसं मोहम्मद शबाउद्दीन गिरफ्तारी भेल छल। बरख 2010केर जनवरीमे गुप्त सूचनाक आधार पर पूर्णिया रेलवे स्टेशनसं अलकायदाक आंतकी मिर्जा खान केँ गिरफ्तार कएल गेल, तऽ 17 अगस्त, 2011 केँ हुजी केर आतंकी रियाजुल केँ किशनगंजसं पकड़ल गेल छल।
एक बेर फेर ATS केर टीमकेँ सफलता भेटलजखन मधुबनीसं 24 नंवबर, 2011 केँ इंडियन मुजाहिदीनक आतंकी अहमद जीमल आ मोहम्मद अजमल केँ गिरफ्तार कएल गेल। पछिला नवंबर महीनामे चेन्नई पुलिसक विशेष शाखा इंडियन मुजाहिदीनक आतंकवादी आ समस्तीपुरक रहनिहार इरशादखान केँ गिरफ्तार केलक आ 12 जनवरी, 2012 केँ इंडियन मुजाहिदीनक नकवी आ नदीम केँ दरभंगासं गिरफ्तार केलक, फेरमई 2012 केँ आतंकवादी घटनाक आरोपमे कर्नाटक पुलिस दरभंगासं कफील अख्तर केँ गिरफ्तार केने छल!