नहि रहला ताराकांत झा

पटना :
बिहार विधान परिषदक पूर्व सभापति आ जदयू क वरिष्ठ नेता ताराकांत झाक रवि केँ पटनाक एकटा निजी अस्पतालमे निधन भऽ गेल। ताराकांत झा 86 बरखक छलथि।

ताराकांत झा बहुत दिन सं बीमार छलथि। बिहार भाजपाक संस्थापक सदस्य म सं एक रहल झा भाजपा में उपेक्षित महसूस लगला पर पिछला 19 फरवरी केँ जदयू क सदस्यता लेने छलथि।

भाजपाक राष्ट्रीय अध्यक्ष राजनाथ सिँह तारा बाबूक मृत्यु केँ अपूरणीय क्षति बतौलनि। बिहारक ग्रामीण विकास आ समाज कल्याण मंत्री नीतीश मिश्र हुनका प्रखर राजनीतिक, मैथिली सेवी बतौबैत मिथिलाक एकटा पैघ नेताक क्षति कहलनि। पूर्व केंद्रीय मंत्री देवेंद्र प्रसाद यादव हुनक निधन केँ मिथिलाक लेल विशेष कऽ अपूरणीय क्षति कहलनि। जदयू नेता आ बिहार योजना पार्षदक सदस्य संजय झा शोक प्रकट करैत कहलनि जे मिथिलाक एकटा सशक्त नेता आइ महाकाश मे चलि गेला।

मिथिला-मैथिली आंदोलनमे सक्रिय भूमिका आ मैथिली केँ संविधानक अष्टम अनुसूचीमे स्थान भेटय, ताहि लेल आंदोलन केँ प्रखर बनेबा लेल हिनका याद कएल जाएत।

ताराकांत झाक मृत्युक बाद हिनक गाम शिवनगर, मधुबनी लगाइत पूरा मिथिला दिवंगत आत्माक शांति लेल लोक सभ प्रार्थना केलनि।