प्रबोध सम्मान रवीँद्र नाथ ठाकुर केँ

पटना : मैथिली भाषाक साहित्यक पुरस्कार प्रबोध साहित्य सम्मान 2015 कवि, गीतकार आ नाटककार रवीँद्र ठाकुर केँ भेटत। सम्मान स्वरुपे ठाकुर केँ प्रतीक चिन्ह, प्रशस्ति पत्र आ 1 लाख रुपया 15 फरवरी केँ देल जाएत। साहित्यकार आ विश्वभारती विवि शांति निकेतन क प्रोफेसर डा. उदय नारायण सिँह नचिकेता क अध्यक्षता मे 12 सदस्यीय निर्णायक मंडली द्वारा इ निर्णय लेल गेल।

प्रबोध साहित्य सम्मान भाषा शास्त्री आ कोलकाता विविक पूर्व हिँदीक विभागाध्यक्ष स्व. डा. प्रबोध नारायण सिँहक सम्मान मे स्वस्ति फाउंडेशन 2004 सं द रहल अछि।

रवीँद्र नाथ ठाकुरक पहिल मैथिली फिल्म 'ममता गाबय गीत' क रचित गीत आइयो प्रसिद्ध अछि। रवीँद्र-महेँद्र क जोड़ी मैथिली मंच पर दशकोँ धरि एकछत्र राज केने अछि। रवीँद्र ठाकुर क दू खंड काव्य सीता आ पंच कन्या प्रकाशित अछि। एकरा संगे गीत संग्रह अतिगीत, प्रगीत, सुगीत, लेखनी एक रंग अनेक, स्वतंत्रता हमर आ रवीँद्र पदावली प्रकाशित आ प्रशंसित अछि।