तेँलगानाक संग होए मिथिला राज्यक घोषणा

दरभंगा/शिवहर/चंपारण/जयनगर : पृथक मिथिला राज्यक मांग लऽ बीतल सोमकेँ मिथिला राज्य संघर्ष समितिक तत्वावधानमे कर्पूरी चौक पर धरना देल गेल। एकर अध्यक्षता सफी अहमद केलनि। कार्यकर्ता लोकनि 'हमरा चाही अपन ताज, हमरा चाही मिथिला राज' भीख नहि अधिकार चाही,हमरा मिथिला राज चाही आदि नाराक संग अपन मांगक प्रति आवाज उठा रहल छलथि।

आयोजित सभाकेँ संबोधित करैत समितिक महासचिव प्रो॰ उदय शंकर मिश्र कहलनि जे भारत सरकार तेलांगना राज्यक घोषणा करय वला अछि, मिथिला राज्य घोषणा एकर संग होए। ओ कहलनि जे मिथिला बहुत पिछड़ल अछि। भारत सरकारक बरक 2011-12 के सर्वेक अनुसार मिथिला क्षेत्रक प्रतिव्यक्ति आय 7 हजार सऽ कम अछि। ओतय पटनाक लगमग 49 हजार आ दिल्लीक 1 लाख 20 हजार वार्षिक आय अछि। इ दखौबैत अछि जे इ इलाका दिल्ली आ पटनाक उपनिवेश अछि। श्री मिश्र कहलनि जे एतय सऽ पलायन कऽ गेल लोकक मनीआर्डर सऽ क्षेत्रवासीक जीवन-यापन होइत अछि। एतय प्राकृतिक संसाधन प्रचुर मात्रामे अछि मुदा एकर सदुपयोग नहि भऽ रहल अछि।

दरभंगाक संगे समिति जयनगर, मोतिहारी, शिवहर आदिमे सेहो धरना देलक।