11म अंतरराष्ट्रीय मैथिली सम्मेलन 22 सं जनकपुरमे

जनकपुर  : 11म अंतरराष्ट्रीय मैथिली सम्मेलन 22 आ 23 दिसंबर कें जनकपुरमे होएत। एहि सम्मलेन मे भारत आ नेपालक राजनेता, साहित्यकार आदि उपस्थित रहता। इ जनतब सम्मेलनक महासचिव डॉ. बैद्यनाथ चौधरी बैजू देलन्हि। ओ बतौलनि जे कार्यक्रमक पहिल दिन सम्मेलनक उद्घाटन नेपालक राष्ट्रपति रामवरण यादव करता। नेपालक भूतल परिवहन मंत्री अमलेंदु निधि बतौर मुख्य अतिथि उपस्थित रहता। कार्यक्रमक अध्यक्षता लनामिवि क कुलपति डॉ.साकेत कुशवाहा करता। कार्यक्रम सं पहिले मिथिला जागरण यात्रा निकालल जाएत। एहि दिन विभिन्न भाषाक विद्वान कें 'मिथिला रत्न' सं सम्मानित कयल जाएत ओतहि दोसर दिन कामेश्वर सिंह दरभंगा संस्कृत विविक कुलपति डॉ.देवनारायण झाक अध्यक्षतामे आयोजित समारोहमे सेमिनार, नाटक आ कवि सम्मेलनक संग सांस्कृतिक कार्यक्रमक आयोजन होएत।

बता दी जे अंतर्राष्ट्रीय मैथिली सम्मेलन सभ बरख 22 आ 23 दिसंबर कें मैथिली अधिकार दिवस क रुपे मनायल जाइत अछि, एहि दिन मैथिली भाषा कें संविधानक आठम सूची मे जोड़ल गेल छल।